Fíxose de rogar, pero finalmente picou o campanu do Eo, o primeiro
salmón da tempada. E fíxoo por partida dobre, nas zonas galega e
asturiana. O primeiro sacouse onte a terra nun tramo de Galicia, no coto
de Salmeán (A Pontenova). Capturouno Emilio Rodil Cotarelo, de
Taramundi. Pesou 4,3 quilogramos e mediu 75 centímetros de lonxitude por
38 de perímetro. Pero como en Galicia está prohibida a venda de salmóns
o premio foi pouco despois para José Miguel Fernández Fernández, de
Oviedo, que o sacou a terra no coto A Pena, na ponte de San Tirso.
Estaba acompañado dun pescador ilustre, o Marqués, que ao parecer foi
quen o comprou. Pesou 6,5 quilos e mediu 82 de lonxitude por 45 de
perímetro. Estes días víronse varios salmóns. Onte pola mañá soltouse un
e en xornadas precedentes tamén se soltaron no coto tres da Pontenova e
na Volta. Por iso están a acudir bastantes pescadores ao Eo.