A festa anual que a sociedade Rodeo celebrou onte
en Ribeira de Piquín tivo un carácter especial. A posible construción
dunha central eléctrica nun tramo do Eo que pasa por ese municipio
ocupou gran parte dos comentarios desde primeiras horas da mañá ata as
últimas da tarde. Alberto Carballa, presidente de Rodeo, explicou pola
tarde, tras o concurso e a posterior comida de amizade, que as
consecuencias da execución dun proxecto como o da central non só terían
consecuencias no río senón que se notarían en certames como o de onte.
Por iso, agregou, os comentarios sobre esa obra, sometida agora a
información pública no relativo ao seu estudo de impacto ambiental,
abundaron na xornada de onte máis que os referidos aos aspectos da
competición deportiva.
A protesta fíxose máis visible a última hora da
tarde cunha concentración que se realizou en Chao de Pousadoiro, capital
do concello. A pesar da choiva que caía pasadas as sete da tarde, na
localidade celebrouse unha concentración de protesta. Sendas pancartas
de Rodeo e do CIT da Pontenova, de veciños de Ribeira de Piquín e do BNG
exteriorizaban ese rexeitamento.
Máis de mil firmas
Os pescadores emprenderon a comezos deste mes unha
campaña de recollida de firmas en varios municipios ribeiregos do Eo e
noutros próximos. A medida sumou xa máis de 1.000 apoios, aínda que se
espera que a cifra se incremente porque se manterá ata mediados deste
mes.
Mentres tanto, o presidente de Rodeo, Alberto
Carballal, afirmou onte que se espera lograr o respaldo de organismos
públicos nesta campaña de oposición á central. Doutra banda, no concurso
celebrado onte -no que participaron 31 pescadores, procedentes da zona
pero tamén de lugares como Ferrol, Lugo e Ribadeo- resultou vencedor
Francisco Javier Rois, seguido de Carlos Antón Castelo e de Francisco
Domínguez. A maior peza das 21 capturadas no concurso arroxou un peso de
155 gramos.
