Estimados
amigos e veciños:
Son Aurora González Ginzo. Algúns coñecerédesme
como a neta de Sidoro, outros como a filla de Alfredo de Real e outros
seguramente non me coñeceredes, pero poida
que me teñades visto na prensa estes últimos tempos coa lenda Aurora González –
A Pontenova (1970).
Póñome en
contacto con vós porque estou inmersa nun proxecto extremadamente importante
para min, que precisa da colaboración do maior número de persoas posible e creo
que, antes de por ningún outro sitio, debo empezar polo meu pobo.
Algúns xa
teredes coñecemento deste proxecto por medio da prensa, para os que non,
direivos que todo xorde a raíz dun suceso terriblemente dramático que lles
acontece a uns amigos meus: Marta e Antonio. Marta estaba a piques de dar a luz
(faltábanlle dúas semanas) e tivo unha complicación moi grave no seu embarazo
que finalizou cunha cesárea de emerxencia e con ela na unidade de críticos do
Juan Canalejo. Agora está en proceso de recuperación pero perderon á súa nena e
tamén a posibilidade de ter outro fillo por si mesmos, xa que a Marta
tivéronlle que quitar o útero, polo que non pode quedarse embarazada.
Nin que dicir
ten que este foi un acontecemento moi doloroso para eles e para toda a súa
familia, e tamén para a xente que os coñecemos. Por iso, un grupo de amigos
estamos volcados en buscar unha solución: non podemos volver atrás no tempo e
devolverlles á súa pequena, pero si podemos intentar que teñan a oportunidade
de ser pais e de dar todo ese amor que teñen a un fillo que desexan máis que
nada no mundo.
E hai unha
maneira de logralo. Hai unha técnica de reprodución asistida que
permitiría que outra muller xestase o
embrión froito da unión do esperma de Antonio e os óvulos de Marta: a xestación
subrogada. É o que se coñece vulgarmente como “ventre de aluguer”. Seguro que
oístes falar de que Miguel Bosé foi pai de dous nenos mediante esta técnica,
tamén a Baronesa Thyssen e, xa fóra das nosas fronteiras, Ricky Martin, Elton
John, e Ronaldo entre outros, pero hai outros moitos españois que non saen na
prensa ou na televisión e que se van fóra do noso país para acollerse a este
sistema de paternidade/maternidade.
Para eles é
relativamente fácil, porque teñen cartos e poden someterse a esta técnica
noutro estado e inscribir estes nenos no Rexistro Civil español como fillos
propios. Para Marta e Antonio é moito
máis complicado: esta técnica de reprodución asistida é alegal en España e ir
fóra supón un gasto de ó redor de 100.000 euros que eles non teñen (seguide
lendo que non estamos pedindo cartos).
Hai máis casos coma o de Marta e Antonio, ou
parecidos, que fomos coñecendo dende que empezamos a traballar nesta causa. Hai
moita xente que se pon en contacto con nós a través da nosa páxina de facebook
para contarnos que eles tamén queren ser pais ou nais e que a única vía que
teñen de conseguilo é mediante esta técnica.
Por iso nós
estamos intentando que se legalice en España a Xestación Subrogada, con todas
as garantías xurídicas e sanitarias para os futuros pais, para a muller
xestante e, por suposto, para o bebé ou bebés que nazan por medio desta
técnica. Para conseguilo optamos por unha figura da Constitución Española que
establece a participación cidadá na elaboración das leis: a Iniciativa
Lexislativa Popular que consiste, principalmente, en que un grupo de cidadáns (comisión promotora)
presentan ante a Mesa do Congreso dos Deputados
o texto (proposición de Lei) que pretenden que se aprobe. Se a Mesa o admite a
trámite, estes cidadáns terán que recoller 500.000 firmas en nove meses para que
o texto se leve a debate no Pleno do Congreso.
Nós xa nos
temos constituído como Comisión Promotora da Iniciativa Lexislativa Popular
para a Regulación da Xestación Subrogada en España e agora estamos na fase de
redacción da proposición de lei e tamén divulgando o noso proxecto para que,
cando teñamos que empezar a recoller as firmas, xa o coñeza a maior cantidade
de xente posible e, aqueles que o vexan coma algo positivo ou, simplemente,
coma unha faceta máis da nosa liberdade para decidir, poidan mostrarnos o seu
apoio.
Sei que algúns
dos que leades isto non estaredes de acordo, e non pretendo facervos cambiar de
idea, pero tamén sei que moitos estaredes a favor ou, incluso aínda que
pensedes que na situación de Marta e Antonio vós buscariades outro camiño,
veredes a xestación subrogada como unha opción válida para aqueles que por motivos físicos ou de saúde
non poden xestar os seus fillos.
E ese é o
motivo desta carta, darvos a coñecer unha iniciativa que é a solución para
Marta e Antonio e para moitas outras familias españolas.
Quero
pedirvos que entredes na nosa páxina de Facebook, Maternidad Subrogada en España, na nosa páxina de Twitter, @gsubrogada, ou na nosa páxina web, gestacionsubrogadaenespaña.es, para
coñecer este proxecto con máis detalle. Alí poderedes ler o comentario que
deixou Marta contando a súa historia e tamén poderedes ver toda a información
que temos dispoñible sobre a iniciativa.
E tamén quero
pedirvos que esteades pendentes de nós e que nos axudedes a conseguir que esta
lei sexa unha realidade coa vosa firma. Non sabemos canto tempo falta para que
poidamos empezar a recoller firmas pero, tanto no Facebook como na páxina de
internet, teremos colgadas sempre as últimas novas e alí poderedes informarvos
de como vai a iniciativa e, cando chegue o momento, de onde poderedes firmar.
E, por suposto,
se queredes implicarvos mais e axudarnos a recoller firmas, estareivos moi
agradecida. Por favor, para calquera cousa, contactade comigo no noso enderezo:
gestacionsubrogada@yahoo.es
Un afectuoso
saúdo e as miñas máis sinceras grazas polo voso tempo e a vosa comprensión.
Aurora
