Este Venres
15 de Agosto volveuse celebrar con éxito o tradicional Baixeo da Pontenova, que
leva perto de 25 anos de andaina, e o XV Faragulleo, onde participantes e
achegados degustan os faragullos.
150 persoas
baixaron polo río Eo, dende Piegaponte ao pozo da Ola, nun percorrido dunhas
tres horas de duración, baixo o lema “Baixa como podas”. Volveu predominar a
embarcación caseira feita con neumáticos de camión ou tractor.
A proba é
lúdica e moitos dos participantes aproveitaron o percurso para facer paradas en
lugares coma Salmeán ou Valiñalva. Afortunadamente e a pesar das prediccións, o
tempo acompañou con sol en boa parte do percorrido.
O evento
finalizou no pozo da Ola, onde un organizado e sempre disposto equipo de
cociñeiros preparou os faragullos, potente alimento preparado a base de fariña
de trigo e ovos. Os faragullos poden ir aderezados con azúcar, mel, leite, ou
chourizo e torrezos, a gusto da valentía do consumidor. Repartíronse sobre 450
racións, nun entorno de romería onde se xuntaron participantes e achegados.
A SD
Albións, organizadora da actividade, agradece a inestimable colaboración do
Concello da Pontenova e do seu persoal, así como do equipo de voluntarios que
fan posible que este evento sexa cita obrigada cada ano na Pontenova.