[...]
36.000 euros para A Mariña
Dos 100.000 euros contemplados no Plan Estratéxico de Subvencións do
INLUDES para promocionar os produtos autóctonos, un total de 36.000
están destinados a certames organizados na Mariña, e á actividade e
funcionamento das confrarías de pescadores. Deste xeito, xunto á Festa
do Percebe de Celeiro ou PRODUART, o plan tamén beneficia a outras
localidades mariñanas, ó apoiar eventos emblemáticos na comarca, e na
maioría dos casos con sona non só na provincia, senón en toda Galicia,
como son o Mercado Renacentista de Viveiro; a Festa do Berberecho de
Foz; ou a feira de mobles e antigüidades da Pontenova. No resto da
provincia, algunhas das convocatorias apoiadas son as feiras de
artesanía de Castroverde e Guntín; Expogrelo de Abadín; a Festa da Verza
Riza de Labrada, en Guitiriz; a Festa da Castaña de Folgoso do Courel; a
Festa da Cereixa de Ribas de Sil ou a Xornada sobre a Exaltación dos
Produtos do Mar na Montaña, en Becerreá.
A Deputación destina 100.000 euros a mellorar a comercialización dos produtos autóctonos e reactivar a economía da provincia
- O organismo provincial impulsa con esta achega 25 certames
encamiñados a poñer en valor e difundir a calidade dos recursos
agroalimentarios e artesanais de Lugo, así como a actividade de todas as
confrarías de pescadores mariñanas
- A Festa do Marisco da Mariña, presentada esta mañá en Foz; a Festa
do Percebe de Celeiro, que se celebra hoxe na vila viveirense e na que
participará Lara Méndez; e a feira Produart, que terá lugar esta fin de
semana en Burela, son tres das citas que respalda a institución
A Deputación de Lugo destina unha partida de 100.000 euros neste ano
2012 a poñer en valor, difundir e mellorar a comercialización dos
produtos autóctonos da provincia como unha vía para revitalizala
economía luguesa, sobre todo na zona rural, e frear a grave perda de
poboación que está a padecer. Con esta achega, enmarcada no Plan
Estratéxico de Subvencións xestionado polo INLUDES, o organismo lugués
impulsa 25 certames encamiñados a xerar riqueza na provincia
aproveitando os seus recursos agroalimentarios e artesanais, así como a
actividade de tódalas confrarías mariñanas.
“Trátase de impulsar sectores estratéxicos e produtos autóctonos para
contribuír a reactivación da economía local e fixar poboación”,
destacou o Deputado de Economía do Coñecemento, Emprendedores e
Innovación, José Ramón Val, durante a presentación da 3ª Festa do
Marisco, promovida polo grupo de comunicación El Progreso, un acto que
tivo lugar na mañá deste xoves no Concello de Foz. Precisamente, este
evento gastronómico, “que está gañando peso no calendario festivo da
Mariña e do resto da provincia”, indicou Val, é unha das citas que
respalda a institución luguesa, ó igual que a 3ª Festa do Percebe de
Celeiro, que se celebra tamén hoxe na vila viveirense baixo a
organización da Confraría de Pescadores Santiago Apóstol e na que
participará a Vicepresidenta Segunda, Lara Méndez, ou a feira de
Produtos Artesanais e Ecolóxicos (PRODUART), que terá lugar esta fin de
semana en Burela.
36.000 euros para A Mariña
Dos 100.000 euros contemplados no Plan Estratéxico de Subvencións do
INLUDES para promocionar os produtos autóctonos, un total de 36.000
están destinados a certames organizados na Mariña, e á actividade e
funcionamento das confrarías de pescadores. Deste xeito, xunto á Festa
do Percebe de Celeiro ou PRODUART, o plan tamén beneficia a outras
localidades mariñanas, ó apoiar eventos emblemáticos na comarca, e na
maioría dos casos con sona non só na provincia, senón en toda Galicia,
como son o Mercado Renacentista de Viveiro; a Festa do Berberecho de
Foz; ou a feira de mobles e antigüidades da Pontenova. No resto da
provincia, algunhas das convocatorias apoiadas son as feiras de
artesanía de Castroverde e Guntín; Expogrelo de Abadín; a Festa da Verza
Riza de Labrada, en Guitiriz; a Festa da Castaña de Folgoso do Courel; a
Festa da Cereixa de Ribas de Sil ou a Xornada sobre a Exaltación dos
Produtos do Mar na Montaña, en Becerreá.
3ª Festa do Marisco
A Festa do Marisco da Mariña, impulsada polo grupo El Progreso, conta
co apoio da Deputación dende a súa primeira edición porque pon en valor
a riqueza da costa mariñana, pero ademais, segundo destacou José Ramón
Val, “é un moi bo exemplo de que a colaboración entre o sector privado e
as administracións públicas pode dar moi bos froitos. Xuntos somos máis
fortes e xuntos podemos reiventarnos, sacando adiante proxectos que
contribúan a xerar riqueza na provincia aproveitando a calidade dos
produtos autóctonos”.
Nesta ocasión, a cita gastronómica, respondendo o carácter rotatorio
co que naceu, celebrarase o vindeiro 18 de agosto no Paseo da Ribeira de
Foz, despois de ter lugar en Burela na súa primeira edición, e en
Cervo, na segunda. A un prezo competitivo de 20 euros, ofrecerase, de
12:00 a 24:00 horas, un menú composto de nécoras, cigalas, percebes,
mexilóns e berberechos. No caso de comprar de forma anticipada os tiques
-nas oficinas centrais de El Progreso en Lugo, nas súas delegacións de
Burela, Viveiro ou Ribadeo, na oficina turismo de Foz ou no restaurante
Palacio Cristal de Burela- o prezo baixa a 18 euros.
Xunto a Val, no acto de presentación da Festa do Marisco estiveron
tamén presentes a Vicepresidenta Segunda da Deputación, Lara Méndez; o
xefe do departamento de Mar da Xunta para A Mariña e Ortegal, Pablo
Fernández Asensio; o director de Márketing e Publicidade de El Progreso,
José Manuel Bouzada; o cronista oficial de Foz, Suso Fernández; e o
Alcalde focense, Javier Jorge Castiñeira. A nova edición deste festexo
non sería posible sen a colaboración de: El Progreso; Deputación de
Lugo; Concello de Foz; Xunta de Galicia; Palacio de Cristal; Asociación
de Comerciantes, Industriais e Autónomos (ACIA) de Foz; Cetárea Burela;
Distribuciones Carreiras; Logaidea Comunicación; Os Molineros; Nos;
Construcciones y Canalizaciones Saa; e Toldos Jocar.
Comercio electrónico
Outra das actuacións básicas que a institución provincial impulsou co
mesmo fin de poñer en valor e mellorar a comercialización dos productos
autóctonos foi a posta en marcha da plataforma de comercio electrónico
www.losproductosdelugo.com á que xa están adheridas corenta empresas
lucenses. Este primeiro centro comercial virtual da provincia, creado a
través do programa europeo Innova-TE, conta cun apartado específico e
destacado para os produtos autóctonos. A plataforma aumenta as
posibilidades de incrementar o volume de beneficios das empresas ó
abrirlles novos mercados e facilitar as vendas, pois os clientes poden
comprar as 24 horas do día, os 365 días do ano. Este portal non ten
límite de empresas, nin de oferta de produtos. A Deputación creou así
mesmo a marca Lugo Sabe, coa que contan a día de hoxe 35 empresas
agroalimentarias da provincia. Os seus produtos están á venda en tendas
da cadea de supermercados Cemar, en Cafestore e La Palloza Gallega. A
iniciativa tivo tan boa acollida que xa hai moitas firmas interesadas en
recibir tamén este distintivo, polo que o organismo provincial ampliou o
proxecto coa segunda fase do programa Lug02, para a que a Unión Europea
lle concedeu 6,5 millóns de euros.
VOLVER A PONTENOVA.ES
