Carlos Florentino Fotocela |
O PSOE pon á Pontenova como un exemplo do seu investimento na provincia
12/11/2011 - El Progreso (A Mariña)
O presidente da Deputación, o socialista José Ramón Gómez
Besteiro, participou onte nun mitin na Pontenova co candidato ao Senado
do seu partido, Ricardo Varela, presentados ambos polo alcalde, Darío
Campos. Besteiro puxo ao municipio como exemplo do investimento do PSOE
na provincial, xa que recordou exemplos como «o encauzamento do río, o
acondicionamento da estrada nacional e as obras feitas a cargo do plan
E».
O responsable provincial asegurou que «ninguén se ocupou da
Pontenova nos últimos trinta anos. Aquí viuse como os veciños, cos
socialistas, gañaron en dereitos. A colaboración entre a Administración
do Estado, a Deputación e o Concello fixo posible unha nova Pontenova».
En canto a Ricardo Varela, chamou ao público asistente ao mitin
a acudir masivamente ás urnas porque indicou que nestes comicios o voto
útil, baixo o seu punto de vista, «será aquel que nos permita continuar
coas grandes obras comezadas na provincia de Lugo, todas esas grandes
infraestruturas e proxectos que teñen selo e firma socialista».
Hospital
A executiva provincial do PSOE comarcal considera «moi grave»
que as citoloxías a pacientes do Hospital da Costa que normalmente se
resolven en 7 ou 10 días tarden agora «varios meses», que alertan de que
poden supor un atraso vital á hora de recibir tratamento ou executar
unha operación cirúrxica.
Os socialistas reclaman que as veciñas realizan revisións
rutineiras ou preventivas reciban as comunicacións no prazo máis breve
de tempo posible porque din que se pasa o tempo entenden que están ben e
logo o dano psíquico é moito maior.
A responsable de igualdade Beatriz Monroy, engadiu que moitas mulleres realizan xa en clínicas privadas revisións periódicas.
Mitins
A agrupación socialista de Foz porá un bus gratuíto para acudir
ao mitin que Felipe González dará o día 15 en Lugo. O autobús sairá ás
18.30 horas de diante de Facenda.
Os socialistas teñen un mitin hoxe ás 14.00 horas en Lourenzá
coa asistencia da laurentina Rocío López, o secretario xeral do PSdeG
Manuel Vázquez e o candidato ao Senado Ricardo Varela.