Podemos dicir, de forma xenérica, que as casas do rural galego foron
feitas por canteiros que non só artellaban as paredes e tellados, senón que, ao
tempo, proxectaban nos lugares indicados o que ía ser a edificación, en canto a
forma, orientación, locais e luz.
Os propios canteiros tiñan que arrincar a pedra da canteira e o barro
da barreira, posto que, en algúns casos
a obra era presupostada a prezo pechado, ainda que, na maioría, o pago era por
xornais e mantidos polo promotor.
En Galicia rural o ter casa propia deuselle máis importancia que matar
a fame, ainda co bandullo ruxira ao non estar atoado, o caso era dispoñer
dunhas paredes e tellado que tornaran da chuvia e do frio. Si o pensamos é
lóxico, mellor atizar a lareira e mañán será outro día.
Esta é terra de canteiros, non todos bos, pro que se incluian no
gremio, ata podía que souberán falar o
barallés, ainda que as laxas de todolos
tamaños se lles buscara o xeito con barro dabondo.
As Terras de Miranda deu canteiros de caste que se lles pode chamar
artistas da pedra e barro, ahí permañecen as casas de paredes aplomadas,
amosando a armonía do puzle cos nervos
amarelos do barro e cos cantos das esquinas onde se atopan as ringleiras de
pedra co remate das máis fermosas, grosas, do mesmo xeito nas portas e
fiestras, de diferentes tonalidades que semella ao arte pictórico árabe.
As nosas casas son testemuñas da sua propia construcción, dos
nacementos de persoas e gando, de mortes, de festas, de guerras, son seres
viventes centenarios que siguen erguidas afrontando o presente cas pedras no
mesmo so e coas bigas de castaño ou carballo fecundando o seu ventre para
asegurar os chans e manter o equilibrio das paredes. O barro, xunto coa auga,
ben amasado sirve de leito a pedra que con agarimo abraza e asoma polos cantos
o nariz e torna da chuvia para que
resbale e non entre.
Coñecín poucos canteiros, tocoume de ir a cavar barro e amasalo, cousa
nada doada, pegase moito, pois, meu avó que tivo que facer unha parede nun
cabañon perto da casa. Era un bo canteiro, de feito, adicouse algo a esta
profesión. Lembro que escollía as pedras, despois de fotografiar ca mente o
sito onde poñelas, logo quitaballe, co martelo de pico, anacos algunhas delas
ata que o asentamento era o correcto. Cada pouco, plomada a parede.
Aprendeu o oficio dos canteiros veciños, Daniel de Moirón, mestres da
pedra, de feito a miña casa de cen anos, está feita por estes artistas, pai e familia do nomeado.
Sinto orgulllo ao dicir que no Vilar das Pedras houbo uns canteiros de
talla e nesta aldea permañecen casas feitas por estos artistas e en outras
moitas aldeas do concello de A Pontenova e fora dél.
As paredes dereitas como fusos demostran cas mans que as moldearon
foron mans de artistas da pedra e barro e con elas permanace a sua arte para os
tempos vindeiros.