Que Rosalía de
Castro é unha das escritoras máis representativas da lingua e da literatura
galegas é ben sabido por todas e todos. A publicación do seu libro Cantares Gallegos, o primeiro escrito
integramente no noso idioma, desde a vontade firme e inequívoca do seu
significado, sinala o inicio da restauración do uso escrito do noso idioma e o
final de séculos de silencio e esquecemento.
A súa obra é un retrato do pobo
galego e goza dunha total actualidade. Desde o século XIX Rosalía de Castro foi
homenaxeada polas galegas e os galegos como poeta nacional, pois reclamou a
redención da patria galega e asumiu a voz do seu pobo, voz que guiou
permanentemente a súa obra e o seu pensamento. Esta galeguidade intrínseca dos
seus textos, esta comunicación e entendemento permanente co seu pobo, ao se
dirixir a el no seu idioma propio, foi o que a fixo tamén poeta de todos os
pobos, chegando a formar parte da nómina de escritoras máis destacadas da
literatura universal de todos os tempos.
Deste xeito, desde o BNG da
Pontenova, solicitarase ao Concello o recoñecemento, a nivel local, da data do
nacemento de Rosalía de Castro, como unha data sinalada no calendario cultural
municipal.
A portavoz municipal, Mónica
Rancaño, explicou que “levaremos unha moción ao vindeiro pleno onde
solicitaremos a declaración do 24 de Febreiro como Día de Rosalía no noso
Concello”
Esta data está recollida
oficialmente pola Consellería de Cultura da Xunta de Galiza no seu Calendario
do Libro e da Lectura, co que con esta iniciativa preténdese emprender e apoiar
a realización de actividades de promoción da obra desta Galega Ilustre, nas que
participen veciñas e veciños da Pontenova.
Desde o BNG local sinalouse tamén a
necesidade da difusión do coñecemento da súa obra para as galegas e os galegos,
en especial para as xeracións máis novas, co que se buscará un acordo para
“levar a cabo actividades de promoción da obra da nosa escritora que impliquen
ao conxunto das veciñas e veciños do noso Concello, ao mesmo tempo que se
realice unha lectura pública da obra rosaliana en colaboración cos centros
escolares, veciñas e veciños”