20/11/2011 - El Progreso (A Pontenova)
Un incendiario prendeu lume cara ás 19.00 horas de onte a unha
palleira na localidade pontenovesa de Vilameá. Finalmente o lume non
chegou a propagarse grazas á rápida intervención do Grumir e de feito
nin sequera chegou a arder toda a palla que había no silo. Tamén había
leña, que tampouco se queimou.
Desde o Grumir da Pontenova explicaron que o lume na palleira
foi detectado por uns veciños dos propietarios, unha casa coñecida como
De Sabino, que nese momento atopábanse fóra do seu domicilio.
Tras avisar ao 112, en menos dun cuarto de hora chegaron á palleira e enseguida sufocaron as chamas coa motobomba municipal.
En canto á estrutura do inmoble, resultou totalmente intacta.
Con todo, o que preocupa agora entre a veciñanza de Vilameá é
que teñen asumido que entre eles, ou moi preto deles, existe un pirómano
que se dedica a prender lume a este tipo de instalacións.
O pasado xoves viviron un episodio practicamente similar ao de
onte, xa que tamén se detectou por parte dos veciños un incendio nunha
palleira.
Entón non chegaron a avisar ao 112, xa que eles mesmos asumiron
a intervención coa máxima urxencia e conseguiron sufocar as chamas con
cubos de auga e unha mangueira sen que estas chegasen a estenderse.
SEN DÚBIDAS
Responsables do Grumir da Pontenova explicaron, tras intervir
no incendio de onte, que non albergaban ningunha dúbida sobre a
intencionalidade do lume. Sinalaron que no silo non había ningún tipo de
instalación que puidese iniciar as chamas e que a corrente eléctrica
non presentaba ningún problema, polo que está descartado que o lume
comezase pola súa causa.
VOLVER A PONTENOVA.ES