O apagado analóxico na área técnica de Páramo afectará a meirande parte
da provincia de Lugo, unha poboación total de 309.018 persoas. As fases I
e II do Plan Nacional de apagamentos afectaron a 10 concellos lugueses:
Chantada, O Saviñao, Monforte de Lemos, Bóveda, Pobra de Brollón,
Carballedo, Muras, Pantón, Sober e A Fonsagrada.
A fase III comezará nesta área técnica o mércores 10 co apagado dos
emisores de Monterroso e Taboada, o que afectará aos concellos de
Monterroso, Antas de Ulla, Taboada e Palas de Rei. O día 22 apagaranse
os centros de Ribeira de Piquín, Vilalba e Ribeira Piquín II, o que
afectará aos cidadáns de Ribeira de Piquín, Vilalba e Pol. O proceso de
apagados na área de Páramo continuará o día 23 nos emisores de Becerreá,
Conforto, Puentenuevo, Puentenuevo II, Vilamea, Sanpayo e Viveiro, que
dan servizo aos concellos de Becerreá, A Pontenova, Viveiro e Ourol. A
fase III rematará o día 2 co apagado do resto de emisores, incluídos os
principais de Páramo e Cuadramón.
A terceira e última fase do apagado analóxico comezará este mércores 10
de marzo en Galicia, rematará o vindeiro 2 de abril, e afectará a preto
de 1.300.000 galegos. Co remate da fase III, que se desenvolverá nas
áreas técnicas de Domaio (a maior parte de Pontevedra e cinco concellos
da Coruña) e Páramo (a meirande parte de Lugo), todos os galegos terán
acceso único á TDT.
As fases I e II do apagado analóxico realizáronse en Galicia do 18 de
xaneiro ao 1 de febreiro e afectaron a 1.550.000 galegos, o 56% dos
cidadáns da Comunidade, pertencentes a 203 concellos
Durante esta última fase de apagado analóxico, o Goberno galego seguirá a
resolver as dúbidas dos cidadáns sobre a TDT a través do teléfono de
atención 012. A Xunta de Galicia recomenda, ademais, aos cidadáns da
Comunidade que non agarden ata o último día para adaptar a súa
televisión á tecnoloxía dixital.
61 concellos na área de Domaio
A Área Técnica de Domaio está composta por 61 concellos, dos cales 56
pertencen á provincia de Pontevedra e 5 á da Coruña, e que dependen
directa ou indirectamente do emisor principal de Domaio. En total suman
case 979.012 cidadáns que pasarán a recibir o sinal de televisión
unicamente mediante tecnoloxía dixital.
Na provincia de Pontevedra unha ducia de concellos (Crecente, Caldas de
Reis, Catoira, Illa de Arousa, Vilagarcía, Vilanova de Arousa, Silleda,
Lalín, Vila de Cruces, Dozón, Agolada, e Rodeiro) beneficiáronse do
apagado das fases I e II con resultados positivos. Na actualidade, a
cobertura do sinal de televisión dixital é do 97% da poboación, e
agárdase que unha vez rematado todo o despregamento a cobertura chegue
ao contorno do 98%.
Os apagados comezarán o día 10 nos emisores de Oia, Oia II, Cangas,
Curota e Bueu, e afectará aos concellos de Ribeira, A Pobra do
Caramiñal, Rianxo, Dodro, Boiro, Cangas, Oia e Bueu. O día 15 os
emisores afectados serán os das Neves e Arbo, que dan servizo aos
concellos de Arbo, As Neves, Salvaterra, Ponteareas e Salceda de
Caselas.
A fase III continuará o día 23 de marzo coa desactivación dos emisores
da Cañiza, Carril e Moaña, o que afectará aos concellos de Cañiza e
Covelo, ademais doutros de xeitos parcial. O día 24 apagarase o de Meis,
que da servizo aos concellos de Meis, O Grove, Cambados, Ribadumia,
Portas, Barro e Moraña.
Os apagados na área técnica de Domaio rematarán o día 2 co cese
analóxico dos emisores que dan servizo ao resto da provincia de
Pontevedra: Campo Lameiro, Cerdedo, Domaio, A Guarda, Lavadores,
Mondariz, Nigrán, Pazos de Borbén, Pontevedra, Puebla, Redondela,
Tomiño, Tui e Xesteiras. VOLVER A PONTENOVA.ES